Тура жолда жүріп, екі дүниеде де бақытқа бөленіп, Алланың разылығын табуда Пайғамбарымыздың (с.ғ.с.) сүннеттерін ұстану таптырмас қазына іспетті. Бұл туралы қасиетті Құранда:
«Шүбәсіз, Алла елшісінде сендер үшін әрі Аллаға және ақирет күніне бар үмітін артқан (Алланы және ақирет күнін жан-тәнімен қалайтын) һәм Алланы көп еске алып, Оған көп құлшылық ететіндер үшін қай жағынан алсақ та, теңдессіз үлгі-өнеге бар» делінген («Ахзаб» сүресі, 21-аят).
Сүннетті ұстану әрі міндетіміз болса, әрі онда өзімізге, денсаулығымызға пайдалы қаншама ғибрат пен мән-мағына жатыр! Келесі сүннеттердің әрбірінің әсіресе, денсаулығымызға тигізер пайдасы орасан зор:
- Ерте жатып, ерте тұру.
- Жиі күлімсіреу.
- Мисуак қолдану. Айша (р.а.) анамыз жеткізген хадисте: «Пайғамбарымыз (с.ғ.с.): «Мисуак – ауыз тазалығы, Раббыңның разылығы», – деп айтты» (Нәсәйи, таһарат 4).
- Шашты түрлі пайдалы майлармен майлау. Тамақтанғанда асқазанның үштен бірін – тамаққа, бір бөлігін – суға, бір бөлігін – таза ауаға қалдыру.
- Жақсы нәрсе айту немесе үндемеу.
- Хиджама (қан алдыру). Хиджама – емделудің ислами әдісі, денедегі, жандағы және рухтағы барлық ауруларды емдеуге әсер етеді. Әбу Һурайра (р.а.) жеткізген хадисте Алла Елшісі (с.ғ.с.) былай деген: «Жәбірейіл (ғ.с.) маған қан алу – адамдарды емдеудің ең жақсы әдісі екенін хабарлады». (Сахих жәмии –с-сағи-218).
- Науқастың көңілін сұрау.
- Тамақты, суды отырып ішу.
- Оң жақпен ұйықтау.
- Үйге кірерде «бисмилләһ» деу және сәлемдесіп кіру.
- «Үш жіпті шешу».
Пайғамбарымыз (с.ғ.с.): «Сендер ұйықтап жатқанда шайтан әрбіріңнің желкелеріңнен жіпті үш орап жатып әрбір орағанда: «Түн ұзақ, сондықтан тәтті ұйықта» дейді. Егер адам таң намазына тұрып Аллаға шүкіршілік етсе, бір жіп шешіледі, дәрет алса, екіншісі, намаз оқығанда үшеуі де шешіледі. Содан соң ол сергек және жақсы көңіл-күйде болады, керісінше жағдайда, (яғни, ұйықтап қалса) көңілсіз, сылбыр күйде жүреді» деген (Бұхари).