Әрбір мұсылман Жәннатта Пайғамбарымызбен ﷺ бірге болуды аңсайды. Суффа сахабаларынан болған Пайғамбарымыздың ﷺ қызметшісі Әбу Фирас Раби’ бин Кә’б әл-Әсләмидің де аңсары «Пайғамбарымызбен ﷺ Жәннатта қалай бірге болсам» еді. Сол үшін сахаба Пайғамбарымызға ﷺ жан-тәнімен қызмет қылатын. Түндерін Пайғамбарымыздың ﷺ қасында өткізетін. Дәрет суын дайындайтын. Қажет дүниелерін әкеп беретін. Бір күні Пайғамбарымыз ﷺ сахабаның бұл қызметі үшін:

• Қызметіңнің қарымы ретінде менен не қалайсың? – деп сұрайды. Бұл сәтті қалт жібермеген сахаба:
• Жәннатта сізбен бірге болуды қалаймын, – деп көкейдегі арманын, көңіліндегі аңсарын айтады. Сонда Пайғамбарымыз ﷺ:
• Басқа нәрсе сұрасаң... – дейді. Сахаба Әбу Фирас Раби’ сонда да:
• Менің қалауым осы, – деп өзінің өмір бойғы тілегінен айнымайды. Сол кезде Пайғамбарымыз ﷺ:
• Олай болса бұл тілегіңнің орындалуы үшін өте көп намаз оқып, сәжде қылу арқылы маған жәрдем ет, – дейді (Мүслим, «Салат», 226).

Демек, Ардақты Пайғамбарымыздың ﷺ Жәннатта жанынан табылу үшін ықыласпен құлшылығымызды арттыруымыз керек. Көп намаз оқу – Пайғамбарымыздың ﷺ сүннеті. Алла Елшісінің ﷺ  сүннетіне берік болу – оған деген махаббатымыз бен сүйіспеншілігіміздің артуына себеп болады. Ал «мү’мин Жәннатта сүйіктісімен бірге болады» (Әбу Дауд, Адап: 113, Мүслим, Бирр: 50).

Салтан СӘКЕН