Тілдік нұсқа
Радио

мақала

Сәресі ішпегендер нендей нығметтен құр қалады?
17 мамыр, 2018 жыл 2334 Басып шығару нұсқасы

 

Кейде «Сәресін ішпей-ақ ораза тұтып кете берсек бола ма?» деген сауалдар қойылады. Басқаша айтқанда, ауызашар кезінде ішілген ас-ауқатпен ертесі күнгі оразаны жалғастырып кету қалай болады? Бұл, әрине, пенденің еркіндегі шаруа. Оразада таңнан кешке дейін белгілі бір әдеттерден тыйылсаңыз, оразаңыз – ораза. Алайда қазір сәресі ішпеу арқылы нендей нығметтерден құр қалатынымызды айта кетейік. Сәресі ішудің пайдасы мен артықшылықтары туралы өте көп хадис бар. Бірақ біз біреуін ғана келтірейік.

Әбу Сағид әл-Құдриден жеткен хадисте ардақты Пайғамбарымыз (с.ғ.с.) былай деген: «Сәресі деген толығымен береке. Оны тастамаңдар. Тым болмаса қайсыбірің бір жұтым су жұтып алса да. Өйткені, шын мәнінде, Алла Тағала да, періштелер де сәресі ішушілерге салауат жолдайды» (Бұл хадис Ибн Хиббанның «Сахихында», сондай-ақ имам Ахмадтың «Мүснадында» келген.).

Міне, бұл хадисте үлкен сүйінші хабарлар бар. Біріншіден, сәресінің бір бөлігі ғана емес, толығымен берекеден тұрады дейді. Бұл жерде тек ішіліп, желінетін ас-су ғана емес, сол уақыттағы рухани аура да есепке алынып тұр. Мәселен, осы уақытта пенде тән құмарлығынан, басқа да шаһуат талаптарынан ада күйде болады. Жүрегі тазару, арылу процесінде болады. Адамның рухани қуаты тәннің қуатынан басым тұрады. Әр құл бұл уақытта жан жүрегімен Раббысына барынша жақын болады. Міне, сол жағдайда сәресі ішіліп жатқан жерге Жаратқанның ырыс-берекесі төгіледі.

Екіншіден, хадисте айтылғандай, бұл кезде сәресі ішушілерге Алла Тағала мен періштелер салауат жолдайды. Мұсылман ғұламалары Алланың салауаты – Оның рақым-мейірімі, ал періштелердің салауаты – олардың Алладан кешірім тілеуі деп түсіндірген.
Көрдіңіз бе, сәресінде қандай ұлы нығметтер жатыр. Енді осыдан саналы түрде бас тарту, қашу ақылды адамның ісі ме? Алла Тағала мол нығметтерінен құр қалдырмасын.

Асылбек Әуезханұлы

 

asylsoz.kz

Пікірлер

Поле не должно быть пустым!
Комментарий отправлен на модерацию.
    бас мүфти блогы бас мүфти блогы

    Күнтізбе

    Жоғары