Ерекше кешті құлшылықпен өткізуге жиналған халықты Қадір түнімен құттықтаған Атырау өңірінің өкілі, "Иманғали" орталық мешітінің бас имамы Батыржан Мансұров бұл кештің қасиеті жайында əсерлі уағыз-насихат жүргізді. Дәл осы күні жастар арасында өткізілген Құранды жатқа және мәнерлеп оқу бойынша сайыс жеңімпаздарын көпшілік алдында арнайы сый-сияпатпен марапаттады. Мұнымен қоса бас имам Батыржан Берденұлы тарауих намазында хатым еткен түркиялық қари Чордук Садыкқа да жамағаттың және өз атынан ризашылығын білдіріп, қазақы дәстүрдің аясында қаридың иығына шапан жапты. 

Жергілікті Аtyrau телеарнасы "Иманғали" орталық мешітіндегі Қадір түнін тікелей эфир арқылы жүргізіп, имамдардың уағыз-насихаты мен игілікті шараларды өз көрермендеріне дер уағында көрсете білді. 

Сонымен қатар, мешіт имамдары уағыз-насихат арасында сұрақ-жауап сайысын өткізіп, білімді жамағаттарға сыйлықтар табыстады. Мешітке жаңа келген жамағаттарға Ханафи мәзһабымен намаз оқудың үлгісі де көрсетіліп, жат ағымның әрекетінен абай болу жағы да ескеріліп отырды. 

Алла үйіне келген толассыз жамағаттарға еркін құлшылық жасау мүмкіншілігі де берілді. Халық дұғаларын жасап, нәпіл намаздарын оқыды. Құлшылықпен қадір түнін қадірлеп өткізген жамағатқа "Иманғали" орталық мешіті 1000 кісіге арнап сəресі дастарханын жайды.

Мұндай рухани-тəлімдік шара əйел жамағаттары арасында да жоғары деңгейде жалғасты. Бір сөзбен айтқанда, Атырау аймағының жамағаттары бұл түнді есте қаларлықтай құлшыныспен өткізді деуге әбден боларлық. Халық осындай қасиетті Қадір түнін жоғары деңгейде өткізуге қызмет еткен имамдарға ризашылығын білдіріп, таң рауандай бере тарқасып жатты.