Атырау жұртшылығы Ораза айт мерекесін жоғары деңгейде атап, есте қаларлықтай мерекелік көңіл күйде өткізді. Қасиетті оразадан кейін келген Айт намазына орталық «Иманғали» мешітіне он мыңнан аса жамағат жиналды.

Жиналған жұртшылықты  Қазақстан мұсылмандары діни басқармасының Атырау облысы бойынша өкілі, Атырау облысының бас имамы Батыржан Мансұров құттықтап, қасиетті Рамазан айында ізгі істерге ұйытқы болған барша жамағатқа алғыс айтты.

Ұлық мереке құрметіне мешіт ұжымының ұйымдастыруымен аулада құрылған киіз үйлерде айттық дастарxан жайылып, жиылған жұртқа қызмет көрсетілді. Сондай-ақ ақжаулықты аналар үшін "Иманғали" орталық мешіті атынан "Рамазан орамалы" сыйға таратылды. Жұртшылық үшін ұйымдастырылған спорттық ойындар шара мазмұнын арттыра түсті. Жамағат халқымыздың ұлттық ойындары – кір тасын көтеру,  қазақша күрес, қол күресі сынды спорт түрлері бойынша өзара күш сынасты. Әрбір сайыстың жеңімпаз қатысушыларына қой малы және ақшалай сыйлықтар тарту етілді. Өнер сүйер қауым үшін күй тартыс ұйымдастырылды.

Мешіт қызметкерлері бүлдіршіндер үшін тегін ойын алаңдарын құрып, сәбилерге 1100 балмұздақ үлестірілді. Жергілікті уақытпен таңғы сағат 7.00-де басталған Ораза Айт мерекесі көпшіліктің есінде мазмұндылығымен сақталары сөзсіз.