ҚМДБ төрағасы, Бас мүфти Серікбай қажы Сатыбалдыұлының тапсырмасымен еліміздің барлық мешіттерінде "Мектепке жол", "Бір баланы киіндір" республикалық қайырымдылық акциялары өткізілуде.
Осыған орай, ҚМДБ-ның Қызылорда облысы бойынша өкілдігінің ұйымдастыруымен «Ақмешіт-Сырдария» орталық мешітінде «Мектепке жол» қайырымдылық шарасы өтті.
«Мектепке дайындық науқанында әлеуметтік жағдайы төмен, көп балалы, жалғызбасты және қамқоршысынан айырылған отбасылар балаларының мектепке қажетті құрал-жабдықтарын толығымен қамтамасыз етуге жағдайы жете бермейді. Осы орайда, сіздерге көмегімізді тигізу басты мақсатымыз деп санаймыз»,-деді өкіл имам Болатбек Ұласқанұлы.
Акцияға өкілдікке қарасты қалалық мешіттер атсалысып, қалалық білім бөлімінен алынған тізім бойынша және «Зағиптар ұйымы мүшелері» мен мешіт жамағаттарының балаларын қосқанда 500 балаға оқу-құралдарымен жабдықталған мектеп сумкасы таратылды.
Шарапаты мол сауапты шара аясында көмек алған балаларының жүзіндегі қуанышты көрген ата-аналар ұйымдастырушыларға алғыс білдіріп, ризашылықтарын жеткізді.
Пікірлер