Бүгін республикалық «Әзірет Сұлтан» мешітінде Нұр-Сұлтан қаласы өкілдігінің жалпы жиналысы болып өтті. ҚМДБ төрағасының бірінші орынбасары, наиб мүфти Наурызбай қажы Тағанұлының төрағалығымен өткен жиналыста «Діни Жібек жолы. Ислам және жастар: қазіргі заманның сын-қатерлері» атты IV Халықаралық ғылыми-діни конференцияға дайындық жұмыстары талқыланып, бірқатар нақты тапсырмалар берілді.

Айта кетейік, 10-12 сәуір күндері Нұр-Сұлтан қаласында өтетін айтулы шара аясында көршілес Ресей елінің, Орта Азия мемлекеттерінің мұсылман ғалымдары, дін көшбасшылары бас қосатын болмақ. Үш күнге созылатын Халықаралық конференцияның жұмыс жоспарында бірнеше іргелі іс-шара көзделген. Елордамыздағы 10 құлшылық ордасының бас имамдары мен «Астана» медресе-колледжінің басшылығы қатысқан бүгінгі жиналыста жоспарға сәйкес тапсырмалар беріліп, жауапты қызметкерлер бекітілді.

ҚМДБ-ның Нұр-Сұлтан қаласындағы жаңа ғимаратында өтетін Халықаралық жиынның маңыздылығын атап өткен Наурызбай қажы Тағанұлы барша қызметкерлерді аянбай қызмет жасауға шақырды. Халықаралық деңгейдегі конференция жұмысының ойдағыдай өтуі тек ҚМДБ-ның ғана емес, еліміздің де абырой-беделін биіктете түсетінін ескерте кетті.