Қасиетті Құран Кәрімде «мың айдан да қайырлы» деп дәріптелген Қадір түні – исі мұсылманның сағына күтер сәті. Бұл түнгі құлшылықтың сексен үш жылға тең келетінін білмейтін мұсылман кемде-кем болар.

Қарағанды облыстық орталық мешіті бұл түні жамағатқа лық толы. Қасиетті рамазан айы басталғалы адам аяғы басылмаған алып мешітте бұл түні, тіпті, ине шаншар жер қалмады десе де болғандай

Қасиетті Қадір түні Қарағанды облыстық орталық  мешітінде Құран Кәрім хатым етіліп, бата жасалды. Бұдан соң Қарағанды облыстық орталық мешітінің бас имамы Өмірзақ қажы Бекқожа   Құранды хатым еткен үш қариға құрмет танытып, алғысын білдірді.

Қасиетті Қадір түні мешітке жиналған жамағатқа РАНТ мүшелері Ризабек Батталұлы, Қабылбек Әліпбайұлы және Қарағанды облыстық орталық мешітінің бас имамы Өмірзақ қажы Бекқожа түрлі тақырыптарда уағыз-насихат жүргізді.

Таң рауандап атқанша жалғасқан мешіттегі уағыз-насихат тыңдап, құлшылыққа ден қойған мұсылман қауымы бұл түні егеменді еліміз бен кең байтақ жеріміздің амандығын тілеп, бейбітшілігіміздің баянды болуын сұрады.