Қарағанды қалалық «Қазыбек би» мешітіне жаңадан тағайындалған имам Асылхан Нұртайұлын бірқатар дін жанашырлары мен ел ағалары арнайы құттықтап келді. Бұл оқиға мешіт жамағаты үшін үлкен қуанышқа айналды.

Алдымен Қарағанды облысының бас имамы қызметін атқарып, бүгінде Астана қалалық «Кунту қажы» мешітінің имамы болып отырған Өмірзақ Қазкенұлы жаңа имамға ізгі тілегін арнап, ақ батасын берді. Өз сөзінде ол имамдық қызметтің жауапкершілігі зор екенін атап өтіп, халыққа адал қызмет етуге шақырды.

Сондай-ақ, дін жанашыры, көптеген қайырымдылық пен ізгі істердің ұйытқысы болып жүрген Еркебұлан Есенұлы да қуанышқа ортақтасып, жүрекжарды лебізін білдірді.

Құттықтаушылар қатарында Үштөбе ауылдық «Қажыбай қажы» мешітінің наиб имамы Ербол Есенұлы да болды. Ол әріптесін жаңа қызметімен құттықтап, жамағаттың бірлігі мен ынтымағы арта берсін деген тілегін жеткізді.

Сонымен бірге, ұзақ жылдар ұстаздық етіп, талай шәкіртке тәлім берген, бүгінде зейнеткерлікке шыққан ардагер ұстаз Рауза Рақымқызы да имамға өз батасын беріп, ақжарма тілегін арнады.

Игі басқосу барысында айтылған ақ тілектер мен баталар жаңа имамға үлкен демеу болып, жамағатқа да рухани қуаныш сыйлады. Мешіт ұжымы да өз кезегінде имам Асылхан Нұртайұлының қызметіне табыс тілеп, Алла Тағала ел игілігі жолындағы еңбегін берекелі етуін сұрап дұға жасады.

ҚМДБ Қарағанды облысы өкілдігінің баспасөз қызметі