ҚМДБ-ның Қарағанды қалалық «Бала қажы» мешітінің имамы Нұров Махмұд Нұрұлының ұйымдастыруымен асыл дініміз исламның кеңінен құлаш жаюына үлкен үлес қосқан  Бала қажы бабамызды еске алу рухани кеші болып өтті.

Айтулы  кешке Қарағанды облыстық «Әнет баба» мешітінің наиб имамы Құмар Қоныскерей арнайы қатысып, жиылған жамағат пен зиялы қауым өкілдеріне ҚМДБ-ның Қарағанды облысы бойынша бас имамы Әбдіғали Естай Айтуғанұлының сәлемін жеткізді.

«Дін мен дәстүр» аясында өткен шара барысында кештің құрметті қонақтарына дастархан жайылып, ас ұсынылды. «Ғалымның хаты өлмейді, жақсының аты өлмейді» ,- демекші кеш барысында  Бала қажы бабамыздың қоғамға тигізген үлесі, атқарған көптеген жақсы істері туралы ақпараттар айтылып, көпке кеңінен тағы бір таныстырылды. Қарағанды облыстық "Әнет баба" мешітінің наиб имамы бабамыздың өнегелі өмірі туралы насихаттар айтты. Дүйім жамағат ұйып тыңдап, көкейлеріндегі қызықты сұрақтарына жауап алды. Кеш барысында бабамызға және  Алаш қайраткерлеріне, 16-желтоқсан құрбандарына, сонымен қатар,  мешітке қызмет етіп, қазір бақилық болған жандардың рухтарына  Құран бағышталды.

ҚМДБ-ның Қарағанды облысы бойынша баспаөз қызметі