Баршаңызға белгілі ҚМДБ төрағасы, Бас мүфти Наурызбай қажы Тағанұлының тапсырмасы аясында әр аптаның жұмаға қараған кешінде имамдарымыз мешіт жамағатымен бейсенбілік уағыз дастарханында бас қосады. Осы игі үрдіс «Әнет баба» мешітінде жалғасын тапты.

Қарағанды қаласына арнайы іс-сапармен келген ҚМДБ Уағыз-насихат бөлімінің басшысы, РАНТ мүшесі Батыржан Мансұров жергілікті жамағатпен жүздесіп, «Ихсан – рухани тәрбие негізі» тақырыбында уағыз-насихат жасады.

Берекеге толы рухани кеште ҚМДБ-ның Қарағанды облысы бойынша бас имамы Естай Айтуғанұлы арқа жұртына арнайы ат басын бұрып келген білікті маман Батыржан Берденұлына алғыс айта отырып, сөз кезегін ұсынды.

Бөлім басшысы жамағатты ұйымшылдық пен бірлікке шақыра отырып, ихсани тәрбие негіздері мен мұсылманның құлшылыққа деген ынта-жігерін арттыруға бағытталған бағалы кеңестерін айтып өтті. Сондай-ақ, адамның рухани дамуы, жүрек дерттерінен сақтану мен оның алдын алудың маңыздылығын түсіндірді. Кешке жиналған жамағат үлкен әсер ала отырып, өз алғыстары мен ізгі тілектерін білдірді.