Center Image
IHSAN.KZ
«Жастар – руханият шамшырағы» ІІ республикалық Жастар форумы өтті
«Жастар – руханият шамшырағы» ІІ республикалық Жастар форумы өтті

Қазақстан мұсылмандары діни басқармасының төрағасы, Бас мүфти Наурызбай қажы Тағанұлының бастауымен «Ислам және дәстүр құндылығы» жылы аясында «Жастар – руханият шамшырағы» ІІ республикалық Жастар форумы ұйымдастырылды. Шараға Қарағанды өкілдігі «Әнет баба » мешітінің Жастар ісі секторының жауапты маманы Жанайдаров Думан Қамариденұлы және мешіт шәкірттері қатысты. Форум Қазақстан Республикасының Мемлекеттік Әнұранымен ашылды. ҚМДБ Құран секторының меңгерушісі Серік қари Ахмет құран аяттарын оқып, Бас мүфти Наурызбай қажы Тағанұлы ел амандығы мен тыныштығы үшін дұға жасады. Форумның екінші бөлімінде сала мамандары өз тәжірибелерімен бөлісіп, баяндамаларын оқыды. 

Сонымен қатар Бас мүфти Наурызбай қажы Тағанұлы су тасқыны кезінде ел тұрғындарына көмек беріп, белсенді жұмыс атқарған азаматтарға алғыс хат табыстады. Олардың қатарында  «Әнет баба » мешітінің Жастар ісі секторының жауапты маманы Жанайдаров Думан Қамариденұлы да бар.

«Сізге Діни басқарманың игі бастамаларына қолдау білдіріп, ел басына күн туған қиын сәтте көмекке мұқтаж жандарға демеу болғаныңыз үшін алғысымды білдіремін. 2024 жылдың көктемі еліміздің Қостанай, Ақтөбе, Атырау мен Батыс Қазақстан облыстары, өзге өңірлер үшін де оңай болмады. Су тасқыны қоңыр тіршілік кешіп отырған қарапайым тұрғындарды әбігерге салып, қиындық келтірді. Ел басына күн туғанда етігімен су кешкен еріктілердің қатарында сіз де болдыңыз. Өскен жерін, өмір сүріп отырған баспанасын су басқан талай отбасыға Қазақстан мұсылмандары діни басқармасының жастары, еріктілері қатарында болып, жанашырлықпен жәрдем жасадыңыз. Алла Тағала жұдырықтай жүрегіңіздегі таудай ниетіңізге разы болсын! Отбасыңызға амандық, деніңізге саулық, жұмысыңызға береке тілеймін» делінген алғыс хатта.


Мәзір
Сайт тілі
© 2009 – 2025 IHSAN.KZ | ҚМДБ Қарағанды облыстық «Әнет баба» мешіті Барлық құқықтар қорғалған. Ihsan.kz сайтында жарияланған кез келген материалды көшіру, тарату немесе басқа сайттарға орналастыру кезінде Ihsan.kz сайтына сілтемені міндетті түрде көрсетуді сұраймыз.

© 2025 Сайтты әзірлеген - abir.kz