ҚМДБ-ның Төрағасы Бас мүфти Наурызбай қажы Тағанұлының бастамасымен «Ислам және дәстүр құндылығы» жылы аясында Қарағанды қалалық «Әл-Машани» мешітінің имамы Сайлау Жұмағұлұлының ұйымдастыруымен «Көршіңе қарайлас» атты рухани шара болып өтті.

Дінімізде «Көршімен тату болу» деген ұғым бар. Көршімен тату болу, әрі олармен жақсы қарым – қатынаста бола білу –мұсылмандықтың  белгісі және Алланың сыны. Осы орайда,  «Дін мен дәстүр» бағыты аясында  екі дүние сардары, пайғамбарымыздың (Оған Алланың игілігі мен сәлемі болсын) дүниеге келген  қасиетті мәуліт айының құрметіне орай жүзеге асқан шара барысында мешіт наиб имамы Рахметов Қанат бастаған ақ жаулықты әжелер қауымы жергілікті қала тұрғындарына құрмет көрсетіп, сый-сияпат жасады. Нақтырақ айтқанда, Алла елшісінің (Оған Алланың игілігі мен сәлемі болсын) қысқаша хадистері жазылған кітапшалар мен бүктемелерін және қасиетті жұма күнінің құрметіне жеті шелпек үлестірді.

Шараның басты мақсаты, асыл дініміздегі көрші ақысының маңыздылығын халыққа насихаттау және Пайғамбарымыз (Оған Алланың игілігі мен сәлемі болсын) дүниеге келген мәуліт айын ұлықтау.