Екі дүние сардары, сүйікті Пайғамбарымыздың (с.ғ.с) құрметіне жер-жерде ұйымдастырылып жатқан Мәуліт мерекесі бұл жолы  Қарағанды облысына қарасты Абай аудандық орталық мешітінде жалғасын тапты.

Рухани кеш ең әуелі Құран аяттарын оқумен басталды. Одан кейін аймақ имамы Асхат Қанайұлы жиналған қауымға  ҚМДБ-ның Төрағасы, Бас мүфти Наурызбай қажы Тағанұлының ыстық сәлемін жеткізіп, Мәуліт мерекесінің мәні мен маңызы хақында уағыз-насихат айтты.

Кемел отырыс барысында  мәуліт жыры оқылды. Пайғамбарымызға (с.ғ.с) салауаттар айтылды. Кеш барысында облыстық «Әнет баба» мешітінің наиб имамы  Қоныскерей Құмарұлы және ұстаздар Юсупбек Шұғайұлы мен Олжабек Мурсали  ғаламның рақым нұрына айналған Мұхаммед пайғамбардың (с.ғ.с) өмірбаянына қатысты уағыз-насихат айтты. Бұқар Жырау ауданына қарасты Көкпекті ауылдық мешітінің имамы Нұржан Оңғарұлы қасиетті мәуліт шарифті оқыды.

Мәуліт мерекесінің соңында аймақ имамы  елдің бейбітшілігі мен тыныштығы үшін дұға жасап, жергілікті дін қызметкерлеріне және аймақ жамағатына  ризашылығын жеткізді.

ҚМДБ Қарағанды облысы бойынша баспасөз қызметі