ҚМДБ Қарағанды өкілдігі «Әнет баба» облыстық орталық мешітінде түрлі конфессиялар өкілдерінің кездесуі өтті. Шара 18-қазан – Рухани келісім күніне орай ұйымдастырылған. Бұл күн – адамдарды ұлты мен діни сеніміне қарамастан бір қоғамға мен мүддеге біріктіретін тұрақтылық пен келісім күні. Облыс әкімінің орынбасары Әлібек Әлденей бастаған құрметті қонақтар үшін мешіттің әдемі залдарына экскурсия ұйымдастырылды. Бас имам Естай Айтуғанұлы өңірдің бас мешіті қандай міндеттерді атқарып жатқанын айтып өтті. – Өмірінде қиын жағдайлар орын алған адамдар мешіттер мен шіркеулерден қолдау іздейді. Осыған байланысты сіздер бірге діни өкілдіктердің тиімділігін қалай арттыруға болатынын ойлануларыңыз керек. Отбасылардың ыдырауына жол бермеу үшін бар күш – жігерімізді жұмсауымыз керек, - деп атап өтті облыс әкімінің орынбасары Әлібек Әлденей. Әңгіме дастархан басында жалғасты.  Кездесу барысында өзекті әлеуметтік мәселелер, ата-аналар мен балалардың қарым-қатынасы талқыланды. Әлібек Әлденейдің айтуынша, соңғы уақытта мектепте өз-өзіне қол жұмсау және жәбір көрсету жағдайлары жиілеп кеткен. Ересектер күні бойы жұмыста жүргенде, балаларының психологиялық мәселелеріне назар аудармай, тек материалдық қажеттіліктерін қамтамасыз етеді. Сондықтан діни қызметкерлер уағыздар арқылы ата-аналарды балаларына мұқият болуға шақырса, бұл пайдалы болар еді, деп қолқа салды облыс әкімінің орынбасары. Рухани келісім, ұлттар мен діндер арасындағы бірлік – баға жетпес байлық. «Еліміздегі бұл мейрам бейбітшілік орнатып, тұрақты қоғам құру бастамасына жол ашты»-,дейді түрлі конфессия өкілдері.