ҚМДБ-ның Төрағасы, Бас мүфти Наурызбай қажы Тағанұлының бастамасымен мешіт жамағатының білім аясын кеңейту мақсатында Қарағанды облыстық «Әнет баба» мешітінде «Әрбір мұсылманға білім парыз» тақырыбында бейсенбілік жиын ұйымдастырылып, ҚМДБ Діни білім және кадр даярлау бөлімінің меңгерушісі Хасан Аманқұлов «Әрбір мұсылманға білім парыз» тақырыбында уағыз айтты. 
 
Рухани кеште ұстаз Хасан Ташайұлы әрбір мұсылманға білім алу міндет екенін атап өтті. Сондықтан әр адам өзін-өзі үнемі дамытып,  білім аясын кеңейтіп отыру қажеттігін тілге тиек етті. 
 
Білім жөнінде Құран Кәрімнің алғашқы түскен аятында: «Оқы! Жаратқан Раббыңның атымен оқы!..» («Алақ» сүресі) деп басталатыны баршамызға мәлім. Мұхаммед (с.ғ.с.) пайғамбарымыздың хадисінде де «Садақаның ең абзалы – бір мұсылманның білім үйреніп, кейін оны өзге мұсылман бауырына үйреткені». (Ибн Мәжә) деген.  
 
Жаһандану дәуірінде иманымыз бен білімімізді қатар дамытқанда ғана өркениетті елдердің қатарына қосылатынымызға көз жетіп келеді.  

Білім алу жөніндегі берекелі отырыс соңы сұрақ-жауапқа ұласып, бөлім басшысы Хасан Аманқұлов жамағаттың ауызбіршілігі мен еліміздің амандығын тілеп, батасын берді.