ҚМДБ-ның Төрағасы, Бас мүфти Наурызбай қажы Тағанұлының қолдауымен халықты адал аспен қамту мақсатында «Халал Даму» стандарттау және сертификаттау» мекемесі біздің өңірде де жұмыс атқарып жатыр. Осы орайда ҚМДБ «Халал Даму» ЖШС директоры Айбек Асқарбекұлы Аташев Қарағанды облыстық «Әнет баба» мешітіне бейсенбілік жиынға қатысып, уағыз айтты. 

Ұрпағымыздың ары таза, рухани дүниесі бай болсын десек, отбасымызды адал, таза аспен қамтамасыз етуіміз қажет. «Халал Даму» стандарттау және сертификаттау» мекемесі Ислам елдеріндегі халықаралық ұйымдардың талаптарына сай жұмыс істейді. «QMDB Halal» таңбасы белгіленген сертификат әр өңірдегі арнайы зертханалардан өткен тауарларға ғана беріледі. Айбек Аташев мейлінше дүкендерден осы таңба белгіленген тағам түрлерін алуды ескертті. 

Қарағанды облысының Бас имамы Естай Айтуғанұлы «Халал Даму» стандарттау және сертификаттау» мекемесі ҚМДБ бекіткен талаптарға сай жұмыс атқарып жатқанын атап өтті. Жиын соңында Айбек Асқарбекұлы жамағаттың ауызбіршілігі мен еліміздің амандығын тілеп, батасын берді.