Қарағанды қаласында «Ар-Рахман» атты мешіт ашылды. Іс-шараға облысымыздың бас имамы Естай Айтуғанұлы бастаған облыс, қала имамдары және жергілікті тұрғындар қатысты.

Қарағанды облысының Бас имамы Естай Айтуғанұлы жаңа мешіт ашылғанда құттықтау сөз сөйлеп, Алланың үйін салған «Шығыс» сауда орталығының ұжымына ҚМДБ төрағасы, Бас мүфти Наурызбай қажы Тағанұлының алғыс хаты мен сәлемін жеткізді. Сонымен қатар Қарағанды облыстық «Әнет баба» мешітінің атынан мүфтият баспасынан шыққан 50 кітапты сыйға тартты. ҚМДБ төрағасы, Бас мүфти Наурызбай қажы Тағанұлының бұйрығымен осы мешітке имам болып тағайындалған Әлімжан Қазақбайұлын жамағатқа таныстырып, сый-сияпат көрсетті.

Қарағанды қаласының Федоровка аумағында бұған дейін мешіт болмаған. Көптен күткен халықтың қуанышына орай «Шығыс» сауда орталығының ұжымының қолдауымен шаһарымызда жаңадан «Ар-Рахман» мешіті тұрғызылды. Ғимараттың ішінде бір уақытта шамамен 250-300 адам намаз оқи алады. Онда инфрақұрылым жүргізілген, құжаттары толық рәсімделді. Намаз оқитын жамағатқа бар жағдай жасалды. Мешіттің ашылуында құрметті ақсақалдар мен бас имам лентасын қиып, аналарымыз шашу шашып, жамағат ерекше құрмет көрсетті. Шаһарымызда осымен 10 мешіт халыққа қызмет көрсетеді. Қаланың басқа да аудандарында қажеттілікке орай мешіт ғимараттары салынып жатыр.