Абай қаласындағы шұжық шығаратын «Абай Агро» кәсіпорыны «Халал Даму»  сертификатын жаңартты.

Қазақстан мұсылмандары діни басқармасының төрағасы, Бас мүфти Наурызбай қажы Тағанұлының тапсырмасымен «Халал Даму» стандарттау және сертификаттау мекемесінің директоры Айбек Асқарбекұлы Қарағанды облысында аудит жұмыстарын жүргізді.

Кезекті тексеріс барысында, «Абай Агро» кәсіпорынының шұжықтары өндірілуінен бастап, дүкен сөрелеріне жеткізуіне дейінгі барлық үдеріс толықтай қадағаланды. Дайын өнімдердің сақталуы, тасымалдануы, жеткізуші техникалық құралдардың халал стандартқа сәйкестігі, сату алаңдарында бірыңғай халал өнімдердің орналасуы, қызметкерлердің стандарт талаптарын сақтауы, санитарлық-тазалық мәселелері толығымен тексерілді. Қорытынды акт бойынша, мекемелерде бекітілген стандарт талаптарын бұзу жағдайлары анықталмады.

Бақылау-қадағалау іс-шараларына ҚМДБ жанындағы «Халал Даму» ЖШС бас сарапшы-технологы Айжан Қалмаханқызы, технолог Нұрбек Қанатұлы, Қарағандыдағы өкілі Амангелді Асқаров қатысты.

ҚМДБ – Қарағанды облысы бойынша баспасөз қызметі