Қарағанды облысының бас имамы Естай Айтуғанұлы жұмыс сапарымен Қарқаралы ауданына барып, «Құнанбай қажы» мешітінде жұма намазын жүргізді. Имамның бұл сапарының негізгі мақсаты – аудан мешіттерінде атқарылып жатқан діни қызметті бақылап, жамағатпен жақын байланыс орнату және мешіттердің жұмысын жандандыруға қолдау көрсету болды.

Іс-шара аясында Естай Айтуғанұлы мешітке жиналған жамағатпен кездесіп, «Қазақ даласындағы мұсылмандық мектептің қалыптасу тарихы» жайында уағыз айтты. Облыстың бас имамы «Құнанбай қажы» мешітінің тарихи маңызына тоқталып, халықтың рухани дамуына үлес қосқан атақты тұлғалардың ізгілікті жолын жалғастыру қажеттігін ерекше атап өтті.

Сапар барысында Қарқаралы ауданындағы мешіттердің хал-ахуалы, қысқы маусымдағы жағдайы, жамағатпен атқарылып жатқан іс-шаралар, діни дәрістер мен қайырымдылық істерінің жүргізілу барысы талқыланды. Сондай-ақ мешіт қызметкерлеріне нақты ұсыныстар беріліп, діни білім беруді жетілдіру мен жастарды рухани тәрбиелеу мәселелері көтерілді.

Жергілікті тұрғындар бас имамға аудандағы діни қызметті жақсарту бойынша өздерінің ой-пікірлерін білдіріп, қолдау көрсетуге дайын екендерін жеткізді. Естай Айтуғанұлы мешіттердің жұмысына әрдайым көңіл бөлінетінін, алдағы уақытта да діни және рухани іс-шаралар тұрақты түрде ұйымдастырылатынын айтты.

Бұл сапар жамағаттың көңілінен шығып, мешіттердің қызметін жаңа деңгейге көтеруге серпін берген маңызды іс-шара ретінде бағаланды.