Қарағанды облысының бас имамы Естай Әбдіғали Балқаш қалалық мешітінде «Қоғамда мұсылманның рөлі мен жауапкершілігі» тақырыбында жұма уағызын жүргізді. Уағыз барысында мұсылманның рухани және өмірдегі әлеуметтік орны мен міндеттері жан-жақты талқыланды.

Естай Айтуғанұлы жұма уағызында қай қоғамда болсын әр адам– Ислам құндылықтарын сақтап, адал әрі әділ жолмен айналасындағыларды игі істерге жұмылдыру керектігін айтты. Мұндай игі істерді атқару және жеке бастың пайдасынан гөрі, қоғамның игілігін ойлау әрбір мұсылманның басты міндеті екенін ерекше атап өтті.

Бас имам сонымен қатар, бірлік пен татулықтың қоғамдағы тұрақтылықты сақтаудағы рөліне баса мән берді. Мұсылмандардың бір-бірін қолдап, өзара сыйластық пен ынтымақтастықты нығайтуы – қоғамның тыныштығы мен өркендеуінің кепілі болмақ. Бірлік – береке бастауы екенін айта келіп, жамағатты татулыққа, бауырмалдыққа және бір-бірін құрметтеуге шақырды.

Жұма намазынан кейін Құран оқылып, еліміздің өркендеуі мен дініміздің нығаюына және ел тыныштығы үшін дұға жасалды.