Қарағанды облысының бас имамы Естай Айтуғанұлы Балқаш қаласына іссапармен барып, шаһар басшысы Сапар Сатаевпен ресми кездесу өткізді. Кездесу барысында қаланың діни ахуалы, қоғамның рухани дамуы және Балқаш қаласында жаңа мешіт салу мәселелері талқыланды.

Естай Айтуғанұлы қала әкіміне Бас мүфтидің «Бабалар ізімен» атты кітабын табыстап, онда қазақ дәстүрі мен ислам құндылықтарының үндестігі және олардың қоғамның рухани дамуына ықпалы баяндалғанын атап өтті.

Сонымен қатар, бас имам мешіттердің жастарды ұлттық тәрбие мен діни құндылықтарға баулудағы маңызды рөлін ерекше атап өтіп, діни оқу-ағарту жұмыстарын дамыту және дін мен дәстүрдің байланысын нығайту қажеттігін айтты. Сондай-ақ мешіттердің материалдық базасын жақсарту және жамағат арасында ынтымақ пен бірлікті насихаттау мақсатында іс-шараларды арттыру бойынша нақты ұсыныстар талқыланды.

Кездесу соңында тараптар айтылған мәселелерді қорытындылап, қоғамның рухани дамуына ықпал ететін түрлі жобаларды жүзеге асыруға келісті.