Қарағанды облысының бас имамы Естай Айтуғанұлы Қарағанды қаласындағы Федоровка ықшам ауданында салынып жатқан жаңа мешіттің құрылысымен арнайы танысып, жұмыстың барысын бақылап қайтты. 

Естай Айтуғанұлы мешітті салуға атсалысып жатқан азаматтармен және құрылысшылармен кездесіп, бар жағдайды ақылдасты. Кездесу кезінде бас имам құрылыс сапасын басты назарда ұстау қажеттігін еске салды. 

Сонымен қатар бұл игілікті іске демеушілік жасап жүрген жомарт азаматтар мен құрылысшыларға ризашылығын білдірді. Олардың бұл еңбегі – сауапты әрі ұрпақ үшін өшпес із қалдыратын қасиетті іс екенін айтты. 

Сондай-ақ, мешіттің айналасын абаттандыру мен аумақты көркейту мәселелері де қаралды. Бас имам мешіттің тек құлшылық орны ғана емес, рухани тәрбие мен қоғамды ынтымаққа шақыратын орталық екенін де атап өтті.

Жоспарға сәйкес, мешіттің құрылыс жұмыстары биыл аяқталып, оны халық игілігіне кешіктірмей беру көзделіп отыр.