Қарағанды облыстық «Әнет баба» мешітінде Миғраж түніне арналған насихат кеші өтті. Іс-шара аясында мешіт ұстазы Юсуф Шұғайұлы Исра және Миғраж оқиғасының маңызы мен бұл түндегі ғибадаттың мәнін түсіндірді.

Миғраж түні – мұсылман қауымы үшін ерекше қасиетті түн. Бұл түнде Мұхаммед пайғамбарымызға (оған Алланың салауаты мен сәлемі болсын) Исра және Миғраж оқиғасы көрсетіліп, мұсылман үмбеті рухани терең мағынаға ие болды.

Биыл елімізде қаңтардың 26-нан 27-қараған түні Миғраж түні болып белгіленді. Осы кешке жиналған қауымға дастарқан жайылып, бұл түннің ерекшелігі жайында «Әнет баба» мешітінің ұстазы Юсуф Шұғайұлы баяндап берді. Сондай-ақ Алланың ұлықтығы мен мұсылманның бірлігі және рухани кемелдену жайлы тағылымды ойлар айтылды.

Кеш соңында жамағат бір-бірімен сұхбаттасып, еліміздің өркендеп, асыл дініміздің кеңінен қанат жаюы үшін дұға жасады. Мұндай игілікті іс-шаралар жамағатты имандылыққа жетелеп, бірлігі пен ынтымағын нығайтады.

ҚМДБ – Қарағанды облысы бойынша баспасөз қызметі