ҚМДБ Төрағасы, Бас мүфти Наурызбай қажы Тағанұлы 2025 жылды «Ислам және отбасы құндылығы» жылы деп жариялап, төрт негізгі бағытқа басымдық берген. Алқалы жиында Қарағанды облысының бас имамы Естай Әбдіғали ҚМДБ бекіткен бағыттар аясында өңірлік өкілдіктің маңызды міндеттері бар екенін және биыл да ауқымды істердің жалғасатынын тілге тиек етті. Іс-шараға дін өкілдері, мешіт жамағаты, діни сала мамандары, ғалымдар, қоғам қайраткерлері мен ақсақалдар қатысты.

Рухани кеш барысында облыстың мешіттері мен имамдарының атқарған жұмыстары сараланып, жыл бойы жүзеге асқан маңызды жобалар таныстырылды. Бұл жиында Естай Айтуғанұлы 2024 жылы атқарылған іс-шараларды және облыстағы мешіттер мен имамдардың атқарып жатқан ерен еңбектерін атап өтіп, сол бойынша деректі фильм экраннан көрсетілді.

Қазақстан мұсылмандары діни басқармасының жұмыс жоспарына сай өңірде 131 мешіт халыққа қызмет көрсетеді. Оның ішінде 8 мешіт жаңадан бой көтерді. 22 мешіт күрделі жөндеуден өтті. Сондай-ақ қазіргі таңда 12 мешіттің құрылысы қарқынды жүріп жатыр. «Ел үлесі – пәтерге» жобасы аясында 4 отбасыға 33 300 000 теңге көлемінде баспана берілді. Сонымен қатар, имамдарға арналған қызметтік пәтер салу бастамасымен 36 пәтерлік үйдің іргетасы құйылып, құрылысқа әзірге 42 190 000 теңге қаражат жұмсалды.

ҚМДБ Төрағасы, Бас мүфти Наурызбай қажы Тағанұлы 2024 жылды «Ислам және дәстүр құндылығы жылы» деп жариялады. Қарағанды облыстық өкілдігі жыл бойы Қазақстан мұсылмандары діни басқармасының тапсырмаларын жоғары деңгейде орындап, «Үздік өкілдік» номинациясына ие болды. Сондай-ақ, «Мүфтият үздігі - 2024» жобасы аясында облыстың үздік дін қызметкерлері марапатталды:

* Бақдәулет Қыдырбайұлы Әбілдаев – «Үздік Qamqor Sharapat орталығы»,

* Сәкен Әбікенұлы Мукеев – «Үздік ауыл имамы»,

* Сайлау Амерхажыұлы мен Орманбет Болатұлы – «Ардагер имам» аталымына ие болды.

* 35 имам – ҚМДБ-ның 35 жылдық мерейтойына орай алғыс хатпен марапатталды.

Рухани кеш барысында белгілі айтыскер ақын Дидар Қамиев арнау айтып, Қарағанды өкілдігінің атқарып жатқан жұмыстарын жырға қосты. Дастархан басында қоғам қайраткерлері мен ғалымдар ақ тілегін білдіріп, ақсақалдар еліміз бен жеріміздің амандығына, асыл дініміздің өркендеуіне бата берді.

Жиын соңында бас имам Естай Айтуғанұлы аймағымыздағы мешіт істеріне атсалысып, қолдау көрсетіп келе жатқан ел азаматтарына алғыс айтып, жиналған қауымға ризашылығын білдірді.