Қажыбай қажы мешітінде әйел-қыздар жамағатына қасиетті Шағбан айының маңызы жайында уағыз-насихат өткізілді. Уағызды ұстаз Гүлімжан Уматаева жүргізіп, бұл айдың артықшылығы, жасалатын құлшылықтар мен сауапты амалдар туралы кеңінен баяндады.

Шағбан – Алла Тағаланың мейірімі төгілетін, күнәлар кешірілетін, сауап еселенетін берекелі уақыт. Бұл айда Пайғамбарымыз (с.ғ.с.) ерекше ықыласпен құлшылық жасап, жиі ораза тұтқан. Ол дұғасында:

اللَّهُمَّ بَارِكْ لَنَا فِي رَجَبٍ وَشَعْبَانَ وَبلغنا رَمَضَانَ

«Алла Тағалам, Ережеп пен Шағбан айларын берекелі ете гөр. Бізді Рамазанға аман-есен жеткіз» – деп тілеген.

Уағыз барысында ұстаз Гүлімжан жамағатты бұл айды құлшылықпен өткізуге, ораза ұстауға, Құран оқуға, садақа беруге және жүректі тазартып, ниетті түзетуге шақырды.

Шағбан айының шарапатынан құр қалмай, сауапқа кенелейік!

ҚМДБ Қарағанды облысы бойынпша өкілдігінің баспасөз қызметі.