ҚМДБ бекіткен «Дін мен дәстүр» бағыты бойынша Қарағанды қалалық «Бұқар жырау» мешітінің имамы Құнанбаев Орманбет Болатұлының бастамасымен ат спорты және садақ ату бойынша ұлттық ойындар ұйымдастырылды.

Іс-шара Қарағанды облысының бас имамы Естай Айтуғанұлының тапсырмасымен ұлттық құндылықтарды дәріптеу, саламатты өмір салтын насихаттау және дене шынықтыруды қолдау мақсатында өткізілді.

Өңірдегі дін қызметкерлері атпен жарысып, аударыспақ ойнап, садақ атуда ептіліктерін сынады. Қыстың суық күндерінде денені қыздырып, бой жазуға ықпал ететін бұл спорт түрлері адамды сергек болуға тәрбиелейді. Атпен шабу тепе-теңдікті ұстап, жылдамдық пен ептілікті арттырса, садақ ату мергендік пен зейінділікті шыңдайды.

Таза ауада қозғалыс жасау кеңседе отырып ой еңбегімен айналысатындар үшін ақыл-ойды сергітіп, ағзаның демалуына оң ықпал етеді. Сондай-ақ мұндай топтық спорттық ойындар имамдар арасында татулық пен ынтымақты нығайтып, ұжымдық бірлікті күшейтеді.

ҚМДБ Қарағанды облысы бойынша баспасөз қызметі