ҚМДБ бекіткен «Дін мен дәстүр» бағыты аясында Қарағанды облыстық «Әнет баба» мешітінде өткізілген бейсенбілік уағыз дастарханына жамағат пен студент жастар жиналып, рухани тәрбие туралы уағыз айтылды. Сонымен қатар Бараат түні туралы мағлұмат беріліп, оның қасиеті мен маңызы түсіндірілді.

Уағыз барысында «Өткенге құрмет – тіріге міндет» тақырыбы қозғалып, ата-бабаларды еске алып, олардың рухына құрмет көрсетудің маңызы түсіндірілді. Жастарға үлкенге ізет, кішіге құрмет көрсету – имандылықтың айқын белгісі екені насихатталды.

Мешіт ұстазы Данияр Ерікұлы Бараат кешінің қадір-қасиетіне тоқталып, бұл түннің күнәлардан арылу, дұға-тілектің қабыл болу сәті екенін айта келе, жамағатты Аллаға шүкіршілік етіп, кешірім сұрауға үндеді.

Берекелі кештің соңында бақилық болған мешіт ақсақалы Мұхамедияұлы Закария марқұмға арналып дұға бағышталды. Жиналғандар оның өнегелі өмір жолын еске алып, Құран оқыды. Осындай рухани кездесулер жастарға тәлім-тәрбие беріп, бірлікті нығайтатыны сөзсіз.

ҚМДБ Қарағанды облысы бойынпша өкілдігінің баспасөз қызметі