Қарағанды облысының Бас имамы Естай Айтуғанұлы Қарағанды қалалық Ар-Рахман мешітінде жұма уағызында жамағатпен жүздесті. Ислам дінінің рухани құндылықтарын насихаттап, қоғамдағы татулық пен бірлікті нығайтуды көздеген бұл жүздесу жамағатқа терең ой салып, имандылыққа үндеген маңызды басқосу болды.

Бас имам алдымен мешіттің хал-ахуалымен танысып, жамағаттың жағдайын сұрап, пікірлесті. Мұндай кездесулер мешіт пен жамағат арасындағы байланыстарды нығайтып, рухани ортадағы ынтымақ пен түсіністікті арттырады.

Жұма уағызында биылғы жылдың басты тақырыбы – «Ислам және отбасы құндылығы» аясында әсерлі насихат айтылды. Бас имам отбасы – қоғамның іргетасы екенін атап өтіп, Ислам дініндегі отбасы құндылықтарының мән-маңызын түсіндірді. Сонымен қатар, қоғамдағы рухани құндылықтарды арттырып, адамгершілік пен сабырлыққа шақырды.

Уағыз соңында Құран оқылып, ақсақалдар мұсылман дінінің аясы кеңеюін, мемлекетіміздің ахуалы жақсаруын тілеп, бата берді.