Қарағанды қалалық «Төлеутай ата» мешітінде жамағатқа арналған рухани кеш өтті. Іс-шарада мешіттің имамы Рауан Төлеубекұлы «Берекелі Бараат түні» тақырыбында көркем уағыз айтып, жамағатқа маңызды мәліметтер жеткізді.

Бараат түні – Шағбан айының 15-іне сәйкес келетін қасиетті кеш. Бұл түнде періштелер жер бетіне түсіп, жасалған дұғалар қабыл болады. Уағыз барысында хадистерде айтылған Бараат түнінің ерекшеліктері, Пайғамбарымыздың (оған Алланың игілігі мен сәлемі болсын) бұл түнді қалай өткізгені жайлы әңгімеленіп, ізгі адамдардың осы кешті қалай бағалағаны туралы баяндалды.

Сонымен қатар, Бараат түнінің берекесіне жету үшін орындалуы қажет ізгі амалдар жайлы кеңінен түсіндірілді. Кеш соңында наиб имам жамағатты Пайғамбарымызға (оған Алланың игілігі мен сәлемі болсын) көп салауат айтуға, күнәлардың кешірілуін тілеп дұға жасауға және бұл түнді құлшылықпен өткізуге үндеді.

ҚМДБ Қарағанды облысы өкілдігінің баспасөз қызметі