Шахтинск қалалық «Нұр» мешітінің имамы Мәулен Әбілхайыр Кәсенұлы Абай Құнанбаев атындағы Саран жоғары гуманитарлық-техникалық колледжінің студенттерімен кездесу өткізді. Басқосудың негізгі мақсаты – жастар арасында рухани-адамгершілік құндылықтарды насихаттап, қоғамның өзекті мәселелеріне назар аудару.

Имам өз сөзінде қазіргі қоғамда белең алып отырған түрлі келеңсіздіктерге тоқталып, олардың зиянды тұстарын түсіндірді. Атап айтқанда, «Лудоманияның зардабы», «Құмар ойын – қазіргі қоғамның дерті» сынды тақырыптар кеңінен қозғалды. Сондай-ақ, нашақорлық, ішімдік, ата-анаға құрметсіздік, жат ағымдарға еріп кету сияқты рухани әрі әлеуметтік проблемалар да сөз болды.

Жиын барысында студенттер тарапынан көптеген сұрақтар қойылып, оларға жан-жақты жауаптар берілді. Кейбір жастар құмар ойындарға тәуелділік мәселесі туралы өз ойларын ортаға салып, бұл дерттің қоғамға, отбасына және жеке адамға қаншалықты ауыр тиетінін талқылады. Имам бұл індеттің тек материалдық шығын ғана емес, сонымен қатар рухани азғындық пен отбасының шайқалуына себеп болатынын атап өтті.

Кездесу соңында Мәулен Әбілхайыр Кәсенұлы жастарды саналы өмір сүруге, ізгі амалдарға ұмтылуға, білім алып, қоғамға пайда тигізуге шақырды. Сонымен қатар, әрбір адамның бойында имандылық, адалдық, сабырлылық, ата-анаға құрмет, жауапкершілік сияқты қасиеттердің болуын маңызды екенін айтты.

Студенттер кездесуден мол рухани әсер алып, өз өмірлеріне маңызды сабақ алғандарын жеткізді. Осындай рухани-ағартушылық іс-шаралар жастардың өмірге деген көзқарасын түзеуге, олардың дұрыс жол таңдауларына септігін тигізері сөзсіз.

ҚМДБ Қарағанды облысы өкілдігінің баспасөз қызметі