Саран қалалық мешітінде имам Мұсабеков Нұржігіт Оразалыұлының ұйымдастыруымен «Ақ бата» бата беру сайысы ұйымдастырылды. Бұл игі іс-шара халқымыздың рухани мұрасын дәріптеп, дәстүр мен дінді сабақтастыру мақсатында өткізілді.

Сайысқа арнайы Қарағанды облысы бойынша «Дін мен дәстүр» бағытының өкілі Бақдаулет Қыдырбайұлы төрелік етті. Байқау екі кезеңнен тұрды: бірінші кезеңде қатысушылар «Дін мен дәстүр» тақырыбында билет таңдап, өз білімдерін сарапқа салды. Ал екінші кезеңде ақсақалдар бата беруден жарысқа түсті. Бұл жолы қатысушылардың шешендік өнері, бата беру мәдениеті мен мазмұны басты назарға алынды.

Сайыс нәтижесінде үздік деп танылған Шамшенов Сайлаубай қажы облыстық «Әнет баба» мешітінде өтетін «Ақ бата» сайысына жолдама алды. Жарысқа қатысқан ақсақалдар өздерінің өмірлік тәжірибелері мен рухани білімі арқылы жас буынға өнегелі жол көрсетті.

ҚМДБ Қарағанды облысы өкілдігінің баспасөз қызметі