Қарағанды қалалық «Әл-Машани» мешітінде имам Сайлау Жұмағұлұлының ұйымдастыруымен ҚМДБ бекіткен «Ислам және отбасы құндылығы жылы» аясында ақсақалдар мен зиялы қауым өкілдерімен кездесу ұйымдастырылды.

«Әл-Машани» мешітіндегі бұл басқосуда ұлттық тәрбие, отбасы құндылықтары, жастарға үлгі боларлық өнегелі өмір сабақтары мен қоғамдағы діннің рөлі туралы кеңінен әңгіме қозғалды.

Ақсақалдар өздерінің өмірлік тәжірибелерін бөлісіп, жас буынды адалдыққа, ізгілікке тәрбиелеу мәселесін көтерді. Сонымен қатар қазақтың дәстүрлі отбасылық институтын нығайту, ата-ана мен бала арасындағы қарым-қатынасты дұрыс қалыптастыру жолдары да талқыланды.

Кездесу барысында имам Сайлау Жұмағұлұлы үлкендердің бай тәжірибесін пайдаланып,  қоғамдағы өзекті мәселелерді діни тұрғыда ізгілік жолымен, бірлесіп, кеңесіп шешу қажеттігін атап өтті.. Жиынға қатысушылар өзара пікір алмасып, өз ойларын ортаға салды.

Іс-шара соңында ақсақалдар жастарға бата беріп, мешіт ұжымына алғыс білдірді. Мұндай кездесулер алдағы уақытта да жалғасын табады.
 

ҚМДБ - Қарағанды облысы бойынша баспасөз қызметі