Саран қалалық мешітінде тағылымы мол жиын өтті. Имам Мұсабеков Нұржігіт Оразалыұлының бастамасымен ұйымдастырылған «Әжелер мектебі» аясында қаланың ардақты әжелері бас қосты. Жиынға «Аналар қауымдастығының» төрайымы Гүлжан Жүсіпбекқызы да арнайы қатысып, әйел мәртебесі, отбасы құндылықтары мен ұрпақ тәрбиесі туралы маңызды тақырыптар талқыланды.

Дін мен дәстүр сабақтасқан бұл басқосу барысында «Қоғамдағы әйел адамның орны», «Исламдағы әйел мәртебесі», «Қарт әжелерге деген құрмет» секілді мәні терең мәселелер қозғалды. Қазақтың ақ жаулықты аналары өз өмірлік тәжірибелерімен бөлісіп, отбасы мен қоғамдағы әйел рөлінің маңыздылығын атап өтті.

Іс-шараның тағы бір ерекшелігі – әжелерге деген ерекше құрмет. Жиын соңында дастархан жайылып, арнайы ас берілді. Бұл игі бастама даналықтың, ізеттіліктің, рухани тәрбие мен ұлттық құндылықтардың ұрпақтан-ұрпаққа жетуіне септігін тигізетін маңызды қадам болды.

Саран қаласының мешітінде өткен «Әжелер мектебі» – тек кездесулердің алаңы ғана емес, ұлттық тәрбие мен рухани өрлеудің алтын көпірі. Осындай іс-шаралар арқылы өскелең ұрпақ ата-баба дәстүрі мен дініміздің асыл құндылықтарын бойына сіңіріп, кемел келешекке қадам баспақ.

ҚМДБ Қарағанды облысы өкілдігінің баспасөз қызметі