Саран қалалық мешітінің имамы Мұсабеков Нұржігіт Оразалыұлының ұйымдастыруымен «Қарттарым – асыл қазынам» атты рухани іс-шара болып өтті. Аталмыш жиын Қазақстан мұсылмандары діни басқармасы жариялаған «Ислам және отбасы құндылығы» жылы аясында өткізілді.

Іс-шараға облыс бойынша «Дін мен дәстүр» бағытының жауапты өкілі Бақдаулет Қыдырбайұлы, сондай-ақ өңірдің қадірменді ақсақалдары мен ақ жаулықты аналар қатысты. Жиын барысында ұлттық және діни құндылықтар дәріптеліп, үлкендерге құрмет көрсету – қоғамның басты міндеттерінің бірі екені айтылды.

Ақ дастархан басында жиналған қауымға жергілікті өнерпаздар өз өнерлерін ұсынып, жүрекке жылы тиер дәстүрлі әндер мен термелер орындалды. Сонымен қатар, қонақтарға «Ислам және отбасы құндылықтары» атты кітапша таратылып, отбасының берекесі мен үлкендерді құрметтеудің маңыздылығы жайлы насихат жүргізілді.

Бұл игі шара ата-бабамыздан мирас болып қалған асыл дәстүрлерімізді жаңғыртып, жастарға үлгі боларлық мән-мағынасы терең басқосу болды. Осындай рухани жиындар қоғамдағы бірлік пен мейірімділікті арттыруға ықпал етері сөзсіз.

ҚМДБ Қарағанды облысы өкілдігінің баспасөз қызметі