Қасиетті Рамазан айына дайындық аясында ҚМДБ төрағасы, бас мүфти Наурызбай қажы Тағанұлының бастамасымен Қарағанды облысының бас имамы Естай Айтуғанұлы облыстық «Әнет баба» мешітінде арнайы жиын өткізіп, жауапты мамандарға тиісті тапсырмалар берді.

Жиында «Ихсан және насихат», «Діни оқу-ағарту», «Дін мен дәстүр» бағыттары, «Зекет және қайырымдылық» қоры мен «Шариғат және пәтуа» бөлімі атқаратын жұмыстар пысықталды.

Атап айтқанда, жамағатқа рухани тәрбие беру, діни сауатын арттыру, Құран оқыту курстары мен дәрістер ұйымдастыру және «Ислам және отбасы құндылығы» жылы аясында іс-шаралар өткізу қарастырылды. Сонымен қатар, әлеуметтік жағдайы төмен жандарға көмек көрсету, науқастардың еміне, білім алушыларға қолдау білдіру мәселелері талқыланды.

Тарауық намазын өткізу, ауызашар ұйымдастыру, Құран хатым түсіру, қайырымдылық іс-шараларын өткізу және мешіттің ішкі-сыртқы тазалығын сақтау жұмыстары басым бағыттардың бірі ретінде белгіленді. Сондай-ақ, техникалық құралдардың дайындығы мен түрлі қызметтердің сапасын арттыру тапсырылды.