Қарағанды қалалық «Бұқар Жырау» мешітіне қарилар келді. Жұмада жиналған жамағатқа мешіт имамы Орманбет Болатұлы тарауық намазда Құран хатым түсіретін қариларды таныстырды.

— Қасиетті Рамазан айы – Құран түскен ай. Осынау шарапаты мол айда еліміздің мешіттерінің басым бөлігінде Құран хатым оқылады. Сол себепті біздің мешітке тарауықта Құран түсіруге келген өз еліміздің азаматтары Құмар Ержан Ертайұлы мен Сейфуллин Темірлан Даниярұлын таныстырып отырмын. Құдай қаласа, қос қаридың Құранын үйреніп, оразада мол сауапқа кенелейік, — деді ол.

Сонымен қатар, Орманбет имам:

— Аллаға шүкір, Темірлан Даниярұлы ҚМДБ төрағасы, Бас мүфти Наурызбай қажы Тағанұлы хазіреттің бұйрығымен біздің мешітте арнайы қызмет етіп жатқанын айтқым келеді. Баршаңызға айтарым – осынау қасиетті айда қолымыздан келгенше қайырымдылық жасап, ізгілік пен жақсылыққа шақырайық. Алла сүйікті Отанымыздың іргесін берік етсін! — деп жамағатқа үндеу жасады.

ҚМДБ Қарағанды облысы өкілдігінің баспасөз қызметі