Саран қалалық мешітінің имамы Мұсабеков Нұржігіт Оразалыұлы Алғыс айту күніне орай қала әкімінің алғыс хатымен марапатталды. Құрметті марапатты Саран қаласының әкімі Бұлқайыр Дарын Бейбітұлы «Бір шаңырақ астында» атты форум аясында табыстады.

Форум барысында қоғам игілігі үшін қызмет етіп жүрген бірқатар азаматқа да алғыс хаттар табысталып, олардың қоғамдағы белсенділігі мен еңбегі ерекше аталып өтті.

Алғыс айту күні – Қазақстандағы бейбітшілік пен бірліктің, өзара құрмет пен ынтымақтастықтың белгісі. Бұл күн 2016 жылдан бастап аталып келеді.

Бұл мереке – әртүрлі этнос өкілдерінің қазақ халқына білдірген ризашылығының символы ғана емес, сондай-ақ елдің татулығын, мейірімділігін, қайырымдылығын дәріптейтін маңызды күн. Қиын-қыстау кезеңдерде қазақ халқы жер аударылған түрлі этносты бауырына басып, қамқорлық танытқан. Бүгінде Қазақстан халқы осы ізгіліктің үлгісін жалғастырып, бір шаңырақ астында татулық пен бейбітшілікте өмір сүріп келеді.

ҚМДБ Қарағанды облысы өкілдігінің баспасөз қызметі