Қарағанды қалалық Әл-Машани мешітінің имамы Сайлау Жұмағұлұлының тапсырмасымен мешіт ұстазы Бақытгүл Айтқалиқызы әйелдер жамағатына «Нұр шашқан ай Рамазан» атты ауызашар кешін ұйымдастырды.

Сайлау Жұмағұлұлы барша жамағатты Рамазан айының келуімен құттықтап, ауызашардан бұрын осы қасиетті айдың артықшылығы туралы уағыз айтты. 300-ге жуық жиналған жамағат мешіт ұстаздары оқыған Құранды тыңдап шәкірттердің Құран Хатым дұғасымен ауыз ашты. 

Сонымен қатар Қарағанды облысы бойынша қыздар-әйелдер секторының жетекшісі Әйгерім Берікболқызы «Рамазан - рухани тәрбие айы» тақырыбында және «Әл-Машани» мешітінің ұстазы Бақытгүл Айтқалиқызы «Оразадан алатын ғибрат» тақырыбында уағыз айтты.

Кеш барысында жарапазан, Рамазан кешіне арналған әсем әндер айтылып, жас бүлдіршіндер «Уақыт қадірі» монологын оқыды. Сондай-ақ «Жақсылықта жарысайық» атты қайырымдылық іс-шарасы ұйымдастырылды.

Кеш соңында мешіт ұстаздары және осы кешке мұрындық болған демеушілер арнайы алғыс хатпен марапатталды.

ҚМДБ Қарағанды облысы өкілдігінің баспасөз қызметі