2-Перинаталдық орталықта (Пришахтинск) вакцинацияға орай «Анасының баланың денсаулығына деген жауапкершілігі» тақырыбында жиын өтті. Оған түрлі дін өкілдері, дәрігерлер мен сала мамандары және перзентханадағы ата-аналар қатысты.

«Вакцинацияға дін тарапынан қарсы көрсетілімдер бар ма?» деген сұраққа «Әл-Машани» мешітінің наиб имамы Рахметов Қанат шариғаттағы үкімді негізге ала отырып жауап берді. Ол Исламда адамның денсаулығын сақтау маңызды міндет екенін атап өтіп, хадисте: «Өзіне де, өзгеге де зиян келтіруге болмайды» (Ахмад ибн Ханбал) деп айтылғанын жеткізді.

Шариғат үкімі бойынша, егер вакцина аурудың алдын алу немесе емдеу мақсатында қолданылып, құрамында тыйым салынған қоспалар болмаса, оны қабылдау мубах (рұқсат) саналады. Ал жұқпалы ауру таралып, оның алдын алу екпе алуға тәуелді болса, онда вакцина алу – қажеттілікке айналады.

Сонымен қатар қолданылатын вакцина құрамының халал және таза екеніне көз жеткізу керек. Егер күмән туындаса немесе оның зияны дәлелденсе, балама жол қарастыру керек. Мұндай жағдайда мамандармен кеңесу ұсынылады.

ҚМДБ Қарағанды облысы өкілдігінің баспасөз қызметі