Қарағанды облысының бас имамы Естай Айтуғанұлы «Әл-Ғаффар» мешітінде «Қазақ халқының дәстүрінде ананың орны, қыз баланың маңызы» тақырыбында жұма уағызын өткізді. Бас имам жұмада Ислам дінінде анаға құрмет көрсетуді, әйел затына баса мән беруді парыз ететінін айта келіп,  қазақ халқында да ана мен қыз баланың орны айрықша екенін баяндады. 

Қазақ халқында анаға құрмет – ежелден қалыптасқан құндылық. «Анаңды Меккеге үш рет арқалап апарсаң да, қарызыңнан құтылмайсың» деген хадис адамға ананың рөлі ерекше екенін көрсетеді. Қыз бала – ұлттың ұяты, болашақ ана. Сондықтан оның тәрбиесіне ерекше мән берілген. Ислам діні әйелді отбасының шамшырағы ретінде жоғары қояды. Сонымен қатар әйел адамға, қыз балаға құрмет көрсетуді міндеттейді. Пайғамбарымыз (с.ғ.с.): «Жәннат – аналардың табанының астында» деп, ананың мәртебесін өте жоғары қойғандығына тоқталды.

Естай Айтуғанұлы уағызында аналарға құрмет көрсету мен қыз тәрбиесінің маңызын әңгімеледі. Қазақ дәстүрі мен Ислам дінінің әйелге деген құрметі бір арнада тоғысатынын тілге тиек етіп, отбасы құндылықтарын сақтауға шақырды. Қазақ халқы ананы ардақтаған, ал қыз баланы болашақ ана ретінде ибалы, инабатты қылып тәрбиелеп өсірген. Ислам дінінде де әйелдің мәртебесін жоғары қояды. Сондықтан осы құндылықтарды сақтап, аналарға құрмет көрсету – әрбір мұсылманның қасиетті борышы екенін атап өтті.