Теміртау қаласының орталық «Әлихан Бөкейхан» мешітінде қасиетті Рамазан айында қарттар үйіндегі ата-әжелерге арнайы рухани іс-шара ұйымдастырылды. Бұл игі іс мешіттің имамы Ақниет Сәлімбайұлының бастамасымен жүзеге асты.

Мешіт жамағаты қарттар үйінің тұрғындарына ауызашар беріп, оларға ізгі тілектерін білдірді. Бұл іс-шара тек дастархан жайып, тамақ үлестірумен шектелмей, қарттарға рухани қолдау көрсету, оларды қоғам назарында ұстау мақсатын көздеді.

Ақниет Сәлімбайұлы өз уағызында отбасының қадір-қасиеті мен қарттарға деген құрмет жайында сөз қозғады. Исламда үлкендердің орны ерекше екені, олардың ақыл-кеңесі мен өмірлік тәжірибесі жастар үшін үлкен байлық екендігі атап өтілді. Сондай-ақ жамағатқа - қарттарға қамқорлық таныту, оларға көңіл бөліп, әрдайым жанында болу қажеттігі насихатталды.

ҚМДБ Қарағанды облысы өкілдігінің баспасөз қызметі