Шахтинск қалалық «Нұр» мешітінде қасиетті Рамазан айының қарсаңында жұма намазы оқылып, жамағатқа тарауих намазын жүргізетін қари таныстырылды.

Мешіттің имамы Мәулен Әбілхайыр Кәсенұлы қасиетті айдың басталуына байланысты жамағатқа насихат айтып, тарауих намазының маңыздылығына тоқталды. Сонымен қатар осы жылғы тарауих намаздарын жүргізетін қари Зиноров Абдулсаид Талғатұлын таныстырды.

Зиноров Абдулсаид Талғатұлы – Атырау қаласының тумасы. Ол Қызылорда облысындағы Шиелі қарилық медресесінің түлегі. Қасиетті Құранды жаттап, қари атанған ол Рамазан айында Шахтинск жамағатымен бірге болып, тарауих намазын оқымақ.

Қариды мешіт ақсақалдары жылы қабылдап, оған ақ баталарын берді. Жамағат тарапынан да жылы лебіздер айтылып, қасиетті айда сауапты амалдарды бірге атқаруға ниет білдірілді.

Бұл игі бастама Шахтинск қаласының мұсылмандары үшін үлкен қуаныш болып, Рамазан айының рухани берекесін арттыра түсті

ҚМДБ Қарағанды облысы өкілдігінің баспасөз қызметі