Қасиетті Рамазан айының құрметіне орай, Қарағанды облысы Шахтинск қалалық «Нұр» мешітінде «Жарапазан жыры» айтылып, рухани іс-шара өтті. Іс-шараны мешіттің имамы Мәулен Әбілхайыр Кәсенұлы ұйымдастырып, оған мешіт ақсақалдары мен өнерпаздар қатысты.

Бұл игі бастама Қарағанды қаласынан бастау алып, «Жарапазан айту» эстафетасы ретінде Саран қалалық мешітінен Шахтинскке жетті. Ал Шахтинск қаласы оны Абай аудандық мешітіне жолдап, Рамазан айының рухани мерекесін жандандыруға үлес қосты.

Жарапазан айту – ислам дәстүрімен ұштасқан көне салттардың бірі. Ораза айында таң алдында немесе кешқұрым үй аралап жарапазан жырын айту – халықтың ауызбіршілігі мен ізгі ниетін білдіреді. Осыған орай, Шахтинск қаласының тұрғындары бұл шараға ерекше ықыласпен қатысып, меймандарға құрмет көрсетіп, шашу шашып, өз ризашылықтарын білдірді.

ҚМДБ Қарағанды облысы өкілдігінің баспасөз қызметі