Қасиетті Рамазан айында Қарағанды облыстық «Әнет баба» мешітінде «Зекет және қайырымдылық» қоры мен «Уақып» қоры студент жастармен бірлесіп ауызашар ұйымдастырды.

Іс-шараға арнайы шақырылған аузы дуалы ақсақал Әділ Сабырбекұлы ҚМДБ бекіткен «Дін мен дәстүр» бағыты бойынша уағыз-насихат айтып, жастарға имандылық, ұлттық құндылықтар және қайырымдылық жайында әңгімелеп, тағылымды ой өрбітті. Сондай-ақ заман ағымына сай білім алудың қажеттілігін атап өтіп, жас ұрпақты ілімге ұмтылуға шақырды.

«Зекет және қайырымдылық» қорының жетекшісі Асылхан Рахымжанұлы мен «Уақып» қорының жетекшісі Бақдәулет Қыдырбайұлы жастарға сөз сөйлеп, мемлекеттің болашақта тұтқасын ұстайтын жастардың парасатты, білімді, иманды болуының маңыздылығына тоқталды. Олар жас кезден терең білімге сусындап, бүгінгі күннен бастап иманды, тұлғалы азамат болып қалыптасуға тырысу қажеттігін ерекше атап өтті.

Рамазан айында өткізілген осындай игі іс-шаралар жастардың рухани тәрбиесін күшейтіп, адами құндылықтарды дәріптеуге ықпал етеді.

Жиын соңында дін қызметкерлері Құран оқып, жастарымыздың болашағы жарқын болуына, еліміздің амандығы мен асыл дініміздің берекесі үшін Әділ ақсақал бата берді.

ҚМДБ Қарағанды облысы өкілдігінің баспасөз қызметі