Саран қалалық мешітінде «Қазақ халқының дәстүрінде ананың орны, қыз баланың маңызы» тақырыбында жұма уағызы өткізілді. 

Саран қалалық мешітінде «Қазақ халқының дәстүрінде ананың орны, қыз баланың маңызы» тақырыбында жұма уағызы өтті. Уағызды облыстық «Әнет баба» мешітінің наиб имамы Хумар Қоныскерей жүргізді.

Наиб имам қазақ халқының салт-дәстүрінде, әдет-ғұрпында ананың ерекше орны мен қыз баланың тәрбиесіне қаншалықты мән берілгенін кеңінен баяндады. Ислам дінінде анаға құрмет көрсету, қыз баланы ардақтау – ең маңызды құндылықтардың бірі екені айтылды.

Ананың орны

Имам Құран мен хадистерден дәлелдер келтіре отырып, ананың разылығы – Алланың разылығы екенін еске салды. Пайғамбарымыз (оған Алланың салауаты мен сәлемі болсын):

«Жәннат аналардың аяғының астында», – деп, ананың мәртебесін айқындап берген. Қазақта да «Анаңды Меккеге үш рет арқалап апарсаң да, ақ сүтін ақтай алмайсың» деген тәмсіл бар. Бұл халқымыздың анаға деген құрметінің шексіз екенін көрсетеді.

Қыз баланың маңызы

Қазақ халқы қыз баланы ерекше тәрбиелеген. «Қыз – ұлттың ұяты, халықтың шырағы»,-деп, қыз баланы ардақтап, оның тәрбиесіне асқан жауапкершілікпен қараған. Қыз – болашақ ана, ұрпақтың тәрбиелеушісі. Сол себепті қыз баланы құрметтеу, оның ар-намысын сақтауға мән беру – әрбір мұсылманның міндеті.

Имам өз сөзінде:

«Қыз баланы тәрбиелеу – ұлттың болашағына қамқорлық жасау. Егер бір қоғамда қыз балаға дұрыс тәрбие берілсе, ол отбасының ғана емес, тұтас ұлттың берекесін арттырады. Сондықтан қыз балаларымызды имандылыққа, әдептілікке, ибалыққа баулуға баршамыз жауаптымыз», – деп атап өтті.

ҚМДБ Қарағанды облысы өкілдігінің баспасөз қызметі