Теміртау қалалық орталық «Әлихан Бөкейхан» мешітінің имамы Ақниет Сәлімбайұлы дін қызметкерлерімен бірге «Рамазан – ихсан көрінісі» тақырыбында семинар өткізді. Бұл семинарда имам Ақниет Сәлімбайұлы Рамазан айының адам руханиятына әкелетін өзгерістері мен ихсан ұғымының мәнін терең түсіндіріп, әрбір мұсылманның жүрегінде Аллаға деген сүйіспеншіліктің қалай өсуі керектігін баяндады.

Семинар барысында Рамазан айының тек ораза ұстап, ауыз ашып, дұға жасау ғана емес, рухани тұрғыдан жаңару мен жетілу айы екені атап өтілді. Ихсанның шынайы құлшылықтың көрінісі ретінде, адамның өз-өзімен, отбасымен және қоғаммен қарым-қатынасын жақсартуға бағытталған нақты амалдар ұсынылды.

Имамдар, әсіресе, адамзаттың ең жоғары рухани деңгейіне жету үшін іс-әрекет пен ниеттің дұрыстығы, Аллаға деген шынайы ықылас пен кішіпейілділік маңызды екенін айтты. Рамазан айының әрбір сәтін ихсанмен өткізу арқылы адам құлшылықтың ішкі мәнін түсініп, өз өмірін өзгерте алатынына назар аударылды.

Семинар соңында дін қызметкерлері өзара пікір алмасып, қасиетті айдың мәні мен маңызын қоғамда кеңінен насихаттау үшін бірлесе жұмыс істеуге келісті.

ҚМДБ Қарағанды облысы өкілдігінің баспасөз қызметі