Теміртау қалалық «Әлихан Бөкейхан» мешітінің наиб имамы Қуанышбекұлы Асылбек Қадір түнінің маңызы туралы айтқан уағызында бұл түннің ерекшелігі мен рухани маңызына кеңінен тоқталды.

Имамның айтуынша, Қадір түні – Құранның жер бетіне түсе бастаған қасиетті түні. Бұл түнде Алла Тағаланың мейірімі мен рақымы ерекше мол түседі. Құран Кәрімде бұл түннің мың айдан да қайырлы екені айтылған. Сондықтан осы түні жасалатын әрбір ғибадат, дұға және намаз – үлкен сауаптың бастауы.

Уағызда мұсылманның жүрегі бұл түнде таза болуы тиіс екені, Алладан кешірім сұрап, жасаған қателіктері үшін шынайы тәубе ету қажет екендігі айтылды. Сондай-ақ Пайғамбарымыз Мұхаммед (с.а.с.) Қадір түнін толық ғибадатпен өткізуге, дұға арқылы Алланың мейірімі мен кешірімін тілеуге үндегені еске салынды.

Бұл түнде Құран оқу, нәпіл намаздар орындау, садақа беру сияқты амалдар арқылы рухани тазаруға жол ашылады.

Имам насихатын қорытындылай келе, Қадір түнін барынша пайдалы әрі шынайы түрде өткізуге шақырды. Себебі бұл түн – мүмін жан үшін үлкен мүмкіндіктер мен мол сауаптарға толы.

ҚМДБ Қарағанды облысы өкілдігінің баспасөз қызметі