«Төлеутай ата» мешітінің әйел-қыздар жамағаты ауызашар дастарханында бас қосты.

Әз-Наурыз мерекесінің құрметіне орай мешіт имамы Рауан Төлеубекұлының қолдауымен және мешіт ұстазы Фатима Аманболдықызының ұйымдастыруымен өткен шара барысында әйелдер жамағатына ұлттық сусынымыз – наурыз көже ұсынылды.

Ақ жаулықты әжелер дін мен дәстүр сабақтастығы тақырыбында тағылымды насихат айтты.

Өз кезегінде мешіт ұстазы Фатима Аманболдықызы «Қадір түнінің қасиеті» тақырыбында уағыз айтып, қасиетті түннің қадірі мен мүмінге берер рухани жемісі жайлы түсіндірді.

Рухани шараға Қарағанды қалалық «Қазыбек би» мешітінің ұстазы Ильяс Балауса қатысып, «Рамазан – Құран айы» тақырыбында насихат айтты.

Іс-шара соңында қасиетті Құран аяттары оқылып, ел мен жердің амандығы, береке-бірлігі үшін дұға жасалды.

ҚМДБ Қарағанды облысы өкілдігінің баспасөз қызметі