Қарағанды облыстық «Әнет баба» мешітінде биылғы Наурыз мейрамы ерекше форматта өтті. Қарағанды облысы әкімінің орынбасары Әлібек Әлденей мен өңірдегі түрлі діни конфессия өкілдері «Әнет баба» мешітіне арнайы келіп, мешіт ұжымымен бірге мерекені атап өтті.

Келген қонақтарды Қарағанды облысының бас имамы Естай Әбдіғали қарсы алып, мешіт ұжымымен бірге ұлттық дәстүр мен спорттық ойындарды тамашалады. Игі бастама ҚМДБ бекіткен «Дін мен дәстүр» бағыты аясында ұйымдастырылды.

Мерекелік кездесу барысында ұлттық дәстүр көрсетіліп, мешіт ауласында садақ ату, асық ату секілді ұлттық ойындар ұйымдастырылды. Сонымен қатар қазақ халқының әдет-ғұрпына сай Қарағанды облысы әкімінің орынбасары Әлібек Әлденей сәбидің тұсауын кесті. Сәбидің атасы Әлібек Үсенұлына құрмет көрсетіп, шапан жапты.

Кездесудің соңында киіз үйдегі отырыста діни конфессия өкілдері бір-біріне ізгі тілектерін білдіріп, еліміздің ынтымағы мен тұрақтылығы үшін дұға жасалды. Бас имам Е. Әбдіғали құран бағыштап, ақсақалдар бата берді.

Іс-шара дінаралық келісім мен өзара түсіністікті нығайтып, ел бірлігін арттыруға бағытталды.